انا من سنتين

السلام عليكم ورحمة الله وبركاته 
ممكن احكي موقف عن جوزي هو مش مشكلة ده موقف حصل منه معايا واتمنى من حضرتك تقبله حتى لو بره محتوى الصفحه بس هو جبر خاطر ليا ولجوزي والله هختصر اوي 
انا من سنتين تعبت شوية و وبعد اللف والتحاليل والاشعات طلع عندي کانسر انا متجوزه من ١٠ سنين عندي بنت وولد على فكرة المهم ان جوزي لما عرف والله كنت بسمعه يعيط عليا وانا نايمه ولو حس بيا اني صاحيه يداري عني دموعه ويتظاهر انه عادي ولما كنا بنروح جرعات الكيماوي كان يفضل ماسك ايدي ومسابنيش لحظه واحده والاولاد كانوا عند ماما على طول عشان ميتعبنيش حتى الاكل لو محدش جالي يعمل الاكل هو اللي كان يعمله وانا نايمه من الوصفات على اليوتيوب وياكلني بايده وشعري لما نزل ووقع كله كان يقولي ده انتي كده اجمل بكتير وان شاء الله بعد ما تخفي تفضلي كده ودايما كان جابر بخاطري في امر واصعب الاوقات والظروف ربنا يجبر بخاطره علشان تفضل نفسيتي حلوه لان دايما الدكاترة كانوا يقولو اهم حاجه نفسيتها وده نص العلاج 

انا الحمد لله من شهرين عرفت اني تعافيت تماما وتجاوزت الازمة ديه بفضل الله ثم زوجي الغالي ومعاملته ووقوفه جنبي طول فترة مرضي وعلاجي وعمري ما حسيت منه بملل او كلل رغم شغله المرهق جدا ومسؤلياته الكثير 
انا بس حابه اوجه له الشكر عن طريق الصفحه لانه هو موجود فيها واقوله الف شكر وربنا يخليك ليا و عاوز من حضراتكم تدعولي ان المړض ميرجعش تاني ويحصل ارتداد 
والف شكر انكم استحملوتني وقريتو رسالتي ديه يمكن اكون سبب في اي حاجه حلوه تحصل لاي اتنين بينهم خلاف في حاجات بسيطه ويتصالحوا لان الدنيا مش مستاهله وفيها حاجات صعبة جدا ربنا ما يكتبها على اي حد ويشفي كل مريض