فين مدير

_ فين مدير المخروب دا أنا هقفلكم أم البنك دا النهارده يا عالم يا ڼصابين
اقعد بس يا افندم وبلاش صياح بنك ايه اللي هتقفله هو محل كشړي 
_ فين مديرك يا آنسة دخليني للمدير حالا
المدير بتاعنا مبيقابلش عيال لما تكبر هيبقى يقعد معاك
_ انا كلمة كمان وهنسى انك بنت
متقدرش يا افندم لإني ساعتها هجيبلك الأمن يفرشك على الأرض ويمسح بكرامة حضرتك البلاط
_ انتي مستفزة ليه
حضرتك اللي عصبي بس يا افندم ممكن تترزع عشان نتفاهم
_ نعم !
اتلقح يا افندم بقى انت مش عندك مشكلة انا هتنيل احلهالك
_ اقعد فين 
هتقعد على حجري يعني يا افندم اترمي على الكرسي اللي قدامي دا بلاش غباوة

_ حاااضر اللهم طولك يا روح
ها بقى مشكلتك ايه يا استاذ وليد
_ وكمان عارفة اسمي 
ايوه طبعا هو فيه حد بييجي ينهقلنا في الفرع كل شهر غيرك الكريدت كارد برضو مش كدا 
_ ايوه خاصمين مني الشهر دا 472 جنيه
ما هي دي متأخرات يا استاذ وليد سدد في ميعادك واحنا منخصمش منك حاجة يا بابا
_ يعني واحد اتزنق ومقدرش يسدد فيها ايه لما تستحملوه شهر وللا اتنين
لا الكلام دا لما تكون سالف من خالتك يا استاذ وليد دا بنك
_ طب وانا اعمل ايه بس الحياة هي اللي عمالة تغلى
استهدا بالله بس متزعلش نفسك المشكلة مش في الحياة يا استاذ وليد المشكلة في غباءك
_ نعم 
أيوه داخل في مسابقة مع مرتبك مرتبك يزيد تزود معاه مصاريفك
_ انتي بتسمي ال 4000 جنيه دول مرتب
وايه اللي زانقك في حياة الموظفين دي ما فتحتش مشروع مستقل ليه
_ منين يا آنسة أقل مشروع محتاج راس مال ميقلش عن ربع مليون جنيه
انت عايز تفهمني انك مش محوشلك ربع مليون جنيه 
_ هحوش ربع مليون منين يا آنسة انتي مغيبة
تعالى نحسبها بالورقة والقلم انت پتدخن 
_ اه
بتشرب كام علبة سجاير في اليوم 
_ علبتين تقريبا
بقالك كام سنة 
_ بقالي 20 سنة
طبعا السجاير سعرها كل يوم بيتغير نحسب على متوسط السنين كلها ونقول ٣٠
_ مثلا
في علبتين يعني ٦٠ جنيه في اليوم في ٢٠ سنة يعني ٤٣٨ ألف جنيه سجاير بس
_ يا نهار اسود
ومهبب ومهبب يا استاذ وليد بتقعد على القهوة 
_ في الاجازات بس يعني يوم الجمعة والسبت
بقالك كام سنة بتقعد على القهوة 
_ من وانا في الثانوي عايزة الرقم كله وللا نحسب من اول ما اشتغلت
لا كله .. كله يا وليد
_ يعني 30 سنة مثلا
بتصرف كام كل أسبوع 
_ من 70 ل 100 جنيه
هنعمل حساب غلا الاسعار ونحسب على المتوسط 50 جنيه في الاسبوع يعني 200 جنيه