حبيته

أهلي كمان !!
فجأة مسك ايده ولفها مرة واحده
الراجل جسمه اترفع وأتقلب في الأرض
وهو لسه ماسك دراعه اللي كان اتكسر
نتيجة اللفة والأرتطام في الأرض بشكل قوي وسريع
السواق فضل ېصرخ وقال
خلاص ..خلاص يا بيه حرمت
بقيت بيه دلوقت ..عشان كسرت دراعك
اومال لما أكسر رقبتك هتقولي يا ايه
ومسك رقبته وخنقه ..نزلت من التاكسي بسرعه
وانا بقوله ..خلاص يا هشام ابوس ايدك سيبه
السواق قال بذهول
ايه دا أنتوا تعرفوا بعض 
اه دي معرفة قديمة
قالها وحسيته اتخنق ودموعه هتنزل
وسابني ومشي
جريت وراه في الشارع وأنا بقوله
حقك عليا انا اسفه. 
اسفه !! مفيش داعي يا انسه هدى
مش انسه ولا اقول يا مدام 
هشام أستنى
نعم 
انا سبت محمود ..مقدرتش أكمل معاه
بعد ايه 
انا خسرتك زمان لأني كنت ساذجة وعبيطة
صدقت اللعبة اللي اتعملت عليا من حسناء
ومفكرتش أسمعك ولا اصدقك
ومكنتش عارفه انها عملت دا بدافع الغيرة مني واتخطبت بعدها عشان أنساك لكن انا كنت غبية
وانا اتوجعت وحسيت الدنيا ضاقت بيا
وقررت أسافر واسيب البلد
قولتله
بعدها بكام شهر عرفت انه مش شبهي ولا فاهمني
معرفتش احبه ..قولت لازم اسيبه احسن ليا وليه
بصيت على ايده مشوفتش اي دبلة ..وكملت
وأنت اختفيت وتوقعت انك اتجوزت
بس واضح انك لسه
قالي
نزلت أجازة من اسبوعين ..وأهلي نازلين زن عليا اتجوز
كل أجازه بجيبولي بدل العروسه عشرة
وانا اللي رافض الفكرة
ليه 
يعني مش عارفه 
لا مش عارفه !
انتي متجوزتيش ليه لغاية دلوقت
ها ..أصله !!
اظن انك عرفتي الأجابة دلوقت
احنا مش لاقين روحنا مع حد تاني
منكرش اني حاولت اتجوز وانساكي
بس صدقيني معرفتش
النهارده كنت رايح ازور واحد صاحبي
ومتوقعتش أبدا أني ممكن أشوفك
انا مش مصدقة أن الصدفة جمعتنا من تاني
بعد كل السنين دي..
تعرف ان لبنى مش هتصدق لما أحكيلها اني شوفتك صدفه
ابقي سلميلي عليها
طب ايه انت خلاص هتمشي
اه رايح لصاحبي زي ما قولتلك
طب وهتسافر أمتى 
مش عارف ..بس لما أخطب بقى عشان أرتاح من زنهم
هو انت خلاص نويت يعني 
اه لقيتها ..بنت ناس وطيبة
ملامحي اتغيرت وانا بحاول أداري توتري
طيب تمام ربنا يوفقك ..سلام
استني بس
نعم !!
ماهو انا لسه مخدتش معاد من بابها
كنت هنفجر في وشه وانا بقول
طب وانا مالي !!
ابتسم وقالي
كلمي بابا
طيب عشان تحدد لي معاد معاه