الجزء الأول

الحكايه ابتدت لما لاقيت حد عارض علي جروب ما علي النت سلسله دهب بسعر رهيب كان منزل من تمن الجرام حوالي ٥٠٠ جنيه وكمان من غير مصنعيه وكان شكلها حلو جدااا كأنها سلسله جايه من العصر الفيكتوري مثلا،،لفتت انتباهي انا وناس كتير لكن انا جبت م الاخر واتصلت بالرقم الي كان معروض واول سؤال سألته هي بجد.دهب؟ فقالي طبعا دهب وتقدري تيجي ونروح لاي صايغ يكشف عليها .. فسألته سؤال تاني طب ليه عايز تنزل من سعر الجرام مع أن ده حقك !ولو بيعتها لاي صايغ هتجيب فلوس اكتر لكن هو قالي ان السلسله دي بتاعت جدته الله يرحمها وانها كانت موصيه ان السلسه دي متتباعش ابدآ ولو حصل واتباعت لازم ننزل من سعرها لأنها ق نظرها متتقدرش بمال ! طبعا الكلام كان عبيط اوي ومدخلش دماغي وانا بصراحه شكيت انه سارق السلسله وعايز يخلص منها وخلاص وهو كان  شكله غير متزن كده  وعمال يتهته ف الكلام وصفته  ساعتها بأنه أهبل .. لكن مهمنيش اتقابلنا وروحنا لكذا صايغ كشفنا عن السلسه واتأكدت انها دهب والسلسله كانت حلوه جداا عالحقيقه جمالها لا يقاوم كأن فيها مغناطيس بيشدك.ناحيتها ،،روحت البيت وكنت مبسوطه جداا وحاسه اني عملت انجاز وتميت بيعه انا كسبانه فيها .. انا مين؟ صحيح نسيت اعرفكو ينفسي انا هبه عندي ٢٨ سنه متخرجه من كلية تجاره وبشتغل ف شركة سكرتيره ومرتبي كويس نوعا ما لانها شركه انترناشونال طبعا الشغلانه مجتش بالمؤهلات جت كالعاده بالواسطه حد معرفه يعرف صاحب الشركه ورشحني ووصي عليا ..انا بنت وحيده معنديش اخوات وده لان والدتي بعد ماخلفتني حصلتلها مشاكل في الرحم واضطرت تشيله ووالدي اټوفي وانا ف ٣ كليه وعايشه انا وماما لوحدنا ف شقتنا ف مصر الجديده وماما بتاخد المعاش بتاع بابا والحمد لله الدنيا ماشيه معانا..انا حياتي فاضيه مفيهاش غير الشغل وماما والبيت عندي اصحاب طبعا لكن فين وفين لما بتتكلم كل واحد بقي ملهي ف حياته وكلهم تقريبا اتجوزو ومفاضلش غيري😅 مش هقولكو نبيتقدمليش عرسان لا كان بيتقدم لحد سن ٢٤ سنه تقريبا لكن مكنتش بلاقي فيهم حد مناسب وطبعا كل الي حواليا محسسني اد ايه انا بايره وبضيع احمل سنين عمري ولني عمري ماهتجوز وكل الكلام ده

.الحقيقه الكلام بيأثر فيا فعلا لكن بعد شويه بفكر ف كل النعم الي ربنا مديهالي وبعرف اني احسن من ناس كتير وات الجواز كده كده جاي جاي هو مش إنجاز يعني ولو مجاش عادي برضو .. المهم لما روحت وريت ماما السلسله .. وعجبتها جداا لكن استغربت جدا من سعرها ولما قولتلها السبب الي الراجل قالهولي ردت بنفس الرد بتاعي أنه كلام هبل ومش منطقي..
بصي ياماما منطقي مش منطقي انا خلاص جبتها ومتاكده انها دهب ومش هقلعها من رقبتي ابدا..
--براحتك يابنتي ربنا يفرحك .. يلا قومي عشان نتعشي
=حاضر ياماما .
دخلت غيرت هدومي وبصيت ف المراية واتا لابسة السلسلة ولاقيتها بتلمع لمعه غريبه بتلمع كأنها متسلك عليها ضوء الشمس فضلت بصالها شوية وبعدين فوقت علي صوت ماما بتنادي عليا..خرجت اتعشينا وقعدنا شويه وبعدين دخلنا عشان ننام ..وكانت أول ليله انام فيها وانا معايا السلسله بس مكانتش لوحدها .. مكنتش متخيله الي ممكن يحصل بعد الليله دي .. مكنتش متخيله اني هبقي كده هبقي آنديراميس