حب زائف
كنت هقول ايه لأهله ولا هو هيقول ايه أصلا!
روحت البيت وبعتله مسدج بطمن عليه فيها وبعدها بنص ساعة رد عليا
روحتي السنتر على الفاضي صح
مش مهم يا سيدي المهم إنك تبقى كويس بس
الحمد لله بقيت أحسن من الصبح بكتير متقلقيش
طيب حيث كدة بقى أسيبك تنام شوية عشان ترتاح
تاليا
نعم
شكرا إنك سألتي عليا
العفو
قفلت الشات وأنا مبتسمة وكل شوية أفتح أقرأ جملته وكإني بحفظها جوايا.. بعد نص ساعة لقيته باعتلي
تاليا هو أنا دلوقتي جعان والبيت كله نايم.. المفروض آكل ايه
ضحكت على الرسالة وأنا متخيلة حالته دلوقتي.. أكتر حاجة عز بيكرهها هي إنه يجوع
غيره
تونة
مش بحب السمك يا تاليا وأنت عارفة
عندك إستعداد تنزل
يعني أعتقد إني هقدر
حلو أنزل بقى وهاتلك أي نوع فراخ كرسبي
تاليا أنت جامدة
كنت واثقة إنه عايزني أقوله الخيار دة من الأول عشان لما حد يكتشف الچريمة دي بكرة يجيبها فيا.
فضل غايب حوالي أسبوع بقينا بنتكلم فيه بشكل يومي وفي أي وقت وبقيت دايما سرحانة ودايما بستناه يبعتلي بقيت بحوش ضحكتي وابتسامتي لكلامنا سوا.. الشات اتحول وبقى فون بدأت أتغير من غير ما آخد بالي ومستر عز بقى عز بس.. الألقاب اختفت وبعد ما كنا بنتكلم زي أي اتنين صحاب بس بحدود بقينا بنتكلم زي أي اتنين صحاب من غير الحدود!
مقدرتش لما لاحظت إني مبقدرش أعدي يوم غير ما أكلمه.. مبقدرش أطمن غير لما أسمع صوته.. مبقدرش ابتسم غير معاه ساعتها بس عرفت إني مقدرتش أمنع نفسي من إني أحبه.
أخيرا نزلت
اعملي حسابك الحصة الجاية امتحان
أرحم نفسك بقى أنت لسة خارج من دور عيا
وهطلعه عليكوا وحياتك
فضلت بصاله فترة كبيرة وهو قاعد يراجع شرح الحصة.. بقيت دايما سرحانة في حصصه ومركزة في ملامحه بس بقفل امتحاناته!
عز
الألقاب اللي اتشالت!
والله
ماشي شليها عادي أنا أصلا مستر فرفوش وبحب اصاحب الطلبة بتوعي
بس أنا مش طالبة!
طبعا يا عبيطة أنت مش طالبة..
ابتسمت بأمل ومستنياه يكمل الجملة على أحر من الجمر ابتسملي بلطف وهو بيقولي
أنت أختي الصغيرة يا تاليا ومكانتك في قلبي كبيرة
ابتسامتي اختفت وبدأت ارتعش وأنا بسأله من غير استيعاب
أختك الصغيرة!
تحبي تبقي الكبيرة
أختك الصغيرة إزاي
زي الناس يا تاليا مالك فيكي ايه لتكوني صدقتي إنك أختي الصغيرة بجد دة تعبير عادي!
بس أنا بحبك
طب ما أنا بحبك برضه
مش زي أخويا.. أنا بحبك بجد
تعبيرات وشه فضلت زي ماهي
